Oğlaq Bürcü

By SabuhiRahimli on March 5, 2012
0
22 dekabr – 20 yanvar
Ünsürü – torpaq
Planeti – Saturn
Hakimiyyət müddəti – 31 gün
Simvolları – keçi, nərdivan, qüllə saatı
Düşərli günü – çərşənbə axşamı, şənbə
Düşərsiz günü – bazar ertəsi, cümə axşamı
Metalı – dəmir Uğurlu rəngi – tünd-yaşıl, qara, göy, tutqun sarı, boz
Uğursuz rəngi – ağ Uğurlu daşı – rubin, oniks, Ay daşı Enerji verən çiçəyi – ağ qərənfil, qara lalə
Uğurlu rəqəmi – 3, 5, 7, 8
Müxalif bürcü – Xərçəng
Talismanı – qara pişik, iblis
Şanslı ölkələri – Hindistan, Makedoniya, Birma, Meksika, Baltikyanı ölkələr.
Qısa Xarakteri
Haqqında danışdığımız Zodiak işarəsi altında dünyaya gələn adamların olduqca əzablı taleyi olur. Hələ erkən yaşlarında gələcək həyatını proqramlaşdıran Oğlaqlar nadir hallarda istədikləri ömrü yaşaya bilirlər. Eramızın I əsrində – Roma İmperiyası dövründə yaşayan məşhur astroloq Arbitr Petronin bu bürc haqqında olduqca dəqiq proqnoz verirdi. Belə ki, onun qələmə aldığı “Satirikon” kitabında Oğlaq barədə belə bir ifadə işlənir: “Oğlaq bürcü altında doğulanların dərd əlindən buynuzları çıxır”. Bu məlumat məcazi mənada işlənilsə də, müəllif onun izahını ustalıqla verir. Petronin əsaslandırır ki, bu bürcün sakinləri yaşadıqları ömürdə, xüsusən də, 35 yaşına qədər hədsiz təzyiq və tənələrə, haqsızlıq və amansızlıqlara məruz qalır, son məqamda onların qəlbində hamıya qarşı kin-kidurət və qisasçılıq meylləri güclənir.

Petroninin sözündə həqiqət var. Çünki oğlaqlar bir-iki nəfəri çıxmaq şərtilə heç kimə xüsusi simpatiya bəsləmirlər. Amma bu, heç də o demək deyil ki, hamıya “yuxarıdan aşağı” baxırlar. Belə adamlar çox işləyir, rahatlıq bilmir, hətta xəstə ola-ola yenə də boş durmurlar. Onlar hər şeydən əvvəl özləri üçün, öz ideyaları naminə mübarizə aparırlar. Oğlaqlardan ötrü özlərindən qabaqda heç kəs yoxdur. Bəzən öz doğma övladları da onlar üçün “daha vacib” hesab olunmur.

Zodiak bürclərinin bu nümayəndələri həssas, savadlı, məğrur, təkəbbürlü, ehtiyatsız iş tutmayan, hamının hörmətini qazanmağa çalışan adamlardır. Onların ən mənfi xüsusiyyəti qəfil inadkarlıqları, fikirlərinin tez-tez dəyişməsi, xüsusən də qapalı olmalarıdır. Oğlaqlar yalan uydurub müsahiblərini inandırmaqda passivdirlər. Belələrinin söhbətinə qulaq asanda asanlıqla öyrənmək olar ki, nəyi ciddi deyir-nəyi yalan, nəyi süni deyir-nəyi sidq-ürəklə.

Oğlaq və magiya bir-birinə zidd anlayışlardır. Bu, bir tərəfdən yaxşıdır. Çünki Oğlaqlar magik təsirə məruz qalmırlar, bədnəzərdən uzaqdırlar. Onlar uzun müddət heç bir narahatlıq keçirmədən “qara” mühitdə yaşaya bilir, çox güclü vampirlərlə, pisniyyət insanlarla ünsiyyət yaradırlar. Lakin Oğlaqların da mənfi xüsusiyyətləri az deyil. Belə ki, onlar bəzən qarşılarına çıxan hər şeyi darmadağın edirlər. Oğlağın etmək istədiyi istənilən cadu, tilsim həm onun özünə, həm də düşməninə böyük zərər gətirə bilər. Yeganə bürcdür ki, onlarda özünüinkar, daxili təzadlar boldur. Belə ki, Oğlaqlar bir tərəfdən qara magiyadan hücum üçün maksimum yararlanır, digər tərəfdənsə əllə toxunula bilməyən hər şeyi inkar edirlər. İkinci səbəbə görə onlar magik mərasimlərlə maraqlanmırlar.

Klassik astrologiyaya görə, Oğlaqlar son dərəcə sadəlövh və tez inanandır. Bu səbəbdən də ömürləri boyu başları qalda keçir, bəlalara düçar olurlar. Hindlilərin fikrincə, bu adamların ailədə necə olması yalnız özlərindən asılıdır. İstəsələr, bircə anda hamıda xoş əhval, yaxud da əsəbi gərginlik yaradarlar. Amma nümunəvi ailə başçısı (ev xanımı) olmağa da qabildirlər. Onlar ahıl yaşlarında törətdikləri günahlarını başa düşür, düz yola qayıdırlar. Əlbəttə ki, ömür vəfa etsə…

Oğlaq qadınlar dünyanın ən qəribə, ən sirli, müəmmalı varlıqlarıdır. Onlarla “oyun oynamaq”, onları razı salmaq çox çətindir. Belə qadınlar heç vaxt istəməzlər ki, övladları ata tərbiyəsi alsınlar. Çünki onlar ailədə aparıcı şəxs olmaq üçün hər şeyə gedirlər. Belə qadınlar ömür-gün yoldaşlarını öz iradələrinə tabe etdirir, özlərindən asılı vəziyyətə salmaq istəyirlər. Bu xanımlar həmişə həyat yoldaş-larını passivlikdə günahlandırır, “əfəl” adlandırırlar. Yeri gəlmişkən, qeyd edək ki, belə Oğlaqlara uzunmüddətli ər olmaq hər kişinin işi deyil.

Saturn öz himayəsində olan qadınlara (Oğlaq və Sutökən) yaraşıqlı, gözəgəlimli sifət verir. Hətta onlar 40 yaşında da 16 yaşın-da olan təravətlərini itirmirlər. Amma yuxarıda dediyimiz kimi başlarına gətirilən müsibətlərə görə hamıya, bəzən öz övladlarına da nifrətlə yanaşırlar. Ərə gedənə qədər mənalı və romantik günlər yaşayan Oğlaqlar bəzən sonrakı dövrdə “qəddarlaşırlar”. Onlar öz uşaqlarını xüsusi ampulada tərbiyə edir, hamıdan üstün görməyə çalışırlar. Təəssüf ki, bu proses övladları evlənənə qədər davam edir. “Mən çəkən əzabları sən də çəkməlisən” prinsipini əsas tutan bu qadınlar övladlarını əziyyətə alışdırmağa səy göstərirlər. Bu isə çox vaxt bədbəxt hadisələrlə, ayrılıqlarla nəticələnir.

Sonda bir şeyi də qeyd etmək yerinə düşərdi. Kitabımızda verilən məlumatlara görə bizi qınamağa dəyməz. Ən azı ona görə ki, istifadə etdiyimiz və dünya münəccimlərinin təsdiqlədiyi 6 mənbənin hamısında təxminən eyni məlumatlar yazılıb.

Bu bürcün sakinləri həssas və duyğulu olduqlarından daha çox yaradıcılığa meylli olurlar. Onları qələmsiz təsəvvür etmək çətindir. Tərəzi bürcündən sonra müəllim-pedaqoq peşəsinə ən yaxın olan Zodiak da məhz Oğlaqdır. Belə adamlarda musiqi istedadı da olur. Onlar xırda biznes, texnika, incəsənət və s. sahələrdə asanlıqla məşhurlaşırlar.

Məşhur “oğlaqlar”:

Zeynəb Xanlarova, Eldar Quliyev, İlham Əliyev, Vəfa Quluzadə, Eldar Namazov, Baba Vəziroğlu, Cəmil Həsənli, Arif Hacılı, Rafael Dadaşov, Elza İbrahimova, Kübra Əliyeva, İlham Namiq-Kamal, Nazpəri Dostəliyeva, Nuriyyə Əhmədova, Səfurə İbrahimova, Şəbnəm Tapdıq, Mübariz Əsgərov, Asya Manafova, Namiq Abdullayev, Manana, Rahidə Baxışova, Faiq Ağayev, Fəxriyyə Xələfova, Elməddin Cəfərov və b