haci abgulun surugunu cezanin en agiri

Hacı Abgülün sürgünü, cəzanın ən ağırı

Çərşənbə axşamı, 16 Aprel 2013-də Admin tərəfindən Məqalələr kateqoriyasında yayımlandı.

Əbuzərin haqq çağırışları onun sürgün edilməsinin səbəb idi… (Buna sonda toxunacam)

13 saylı sürgün müəssisəsi…

Ötən günlərdə mübariz ruhani Abgül Süleymanovun saxlanıldığı Azərbaycanın ən pis həbsxanasına, penitensiar xidmətin 13 saylı cəza çəkmə müəssisəsinə getmişdim.

Bu həbsxana elə bir yerdə yerləşir ki, adam ancaq düşməninə belə bir yer arzulayar. Qaradağın Puta məntəqəsində yerləşən bu sürgün müəssisəsinin ətrafında 1 ağaca belə rast gəlmək mümkün deyil. Səhralıq, bataqlıq, tikanlı bitkilər və daş karxanasına çevrilmiş təpələrdən başqa burda heç bir şey yoxdur. İnsan səsi oralara yaddır. Küləyin özü ilə gətirdiyi qum insanın nəfəsini göynədir. Həbsxananın tikildiyi yer isə bataqlıqdır. Binanın 1-ci mərtəbəsi demək olar ki, nəmişlikdən “çökməyə hazırlaşır”. Belə bir şəraitdə heç bir məhkum öz cəzasını çəkə bilməz. Belə bir müəssisəni “cəza çəkmə müəssisəsi” adlandırmaq mümkün deyil. Həbsxananın işçiləri belə, buradan bezarlıq edirlər. Buranın 1 günü bəlkə də 10 ilə bərabərdir. Külək səsindən başqa bir səsə rast gəlmədiyim bu məntəqədə ürəkağradıcı məqamlar çoxdur. Yazmaqla bitməz.

Zülmə barışmayan, haqqı ölümü bahasına olsa belə deyən mübariz şəxs təbii ki, cəzanın ən pisinə layiq görülməli və səhraya sürgün edilməli idi. Bütün bunlar Hacı Abgül Süleymanovun fərqliliyini bir daha açıq şəkildə göstərir.
Belə düşünürdüm ki, təzyiqlər həbs edilənə qədər idi. Lakin mənə artıq aydın oldu ki, şeytan və onun ordusu sonuna qədər Allah yolunda olanlarla mübarizə aparır və təzyiqlərinə son vermir. Ən azından əqidəsindən döndərənə, mübarizəsindən saxlayana qədər. Hacı Abgülün susmamazlığı onun Qaradağda yerləşən sürgün müəssisəsinə köçürülməsinə səbəb olub. Bu mübariz şəxsiyyət 13 saylı sürgün müəssisəsində saxlanılmasından gileylənməsə də, mən gördüklərimlə heç cürə barışa bilmirəm. Təsəvvür edirsinizmi, bu həbsxananın yerləşdiyi məntəqəyə avtobus nəqliyyatı belə yoxdur?! Yalnız hündür avtomobillə bu yollardan keçmək mümkündür. Avtomobillə həbsxanaya yaxınlaşanda Azərbaycandan çıxdığımı, Sibir əyalətinin sürgün müəssisələrinə getdiyimi hiss etdim. İnsan yaşayışı üçün tam yararsız olan bu məntəqənin Hacı Abgülə layiq görülməsi zülmün şiddətini, ruhanimizin isə əqidəsinin möhkəmliyini sərgiləyir. Heç bir siyasət, hiylə, güc bu əqidənin qarşısında tab gətirə bilməz. Abgül Süleymanovun orada 11 il cəza çəkməsi və cəmiyyətimizə sağlam (səhhət baxımından) qayıtması yalnız möcüzə ola bilər. Bununla belə hicabı qadağan edən İslam düşmənləri Abgül Süleymanov xofundadır.

Əziz dostum, mübariz ruhanim və əqidə qardaşım Abgül Süleymanovun çəkdiyi bütün bu məhrumiyyətlər, əzablar onu böyüdür və tarixə həkk edir, özünə ülgü götürdüyü Həzrəti Əlinin ləqəbi olan “Əsədallah” ləqəbi kimi. Tarix şirləri, tülküləri, çaqqalları və canavarları heç vaxt unutmayıb, unutmayacaq da…
Mən əminəm ki, aləmlərin rəbbi olan Allah bu zülmün intiqamını mütləq alacaq. Mütəal Allah Quranda buyurur: “Həqqun ələyna, nəsrul muminin.” Möminə kömək etmək mənim boynumda haqqdır.

İmam Baqir (ə) buyurur: “Əgər bu gün Əbuzəri qəbirdən diriltsək, siz şiələr ona dəli deyəcəksiniz.” Bu gün Abgül Süleymanovun amalını başa düşməyənlərə, onun atdığı addımları dərk etməyənlərə və onun mübarizəsini monipulyasiya edənlərə təəccüblə yanaşmaq lazım deyil.

“Mərhəba bil movt, fi səbilillah”.


Tural Əli
İslamazeri
Şərh yazın